۱؂حضرت عمر نے ’’زیاد‘‘ کو یمن کی ایک مہم پر روانہ کیا۔ جب وہ اس مہم کو سر کرنے کے بعد پلٹا ،تو ایک اجتماع میں (کہ جس میں امیر المومنینؑ، حضرت عمر، عمرو ابن عاص اور ابوسفیان بھی موجود تھے) ایک خطبہ دیا جس سے متاثر ہو کر عمرو نے کہا:

لِلّٰهِ هٰذَا الْغُلَامُ لَوْ كَانَ قَرَشِيًّا لَّسَاقَ الْعَرَبَ بِعَصَاهُ‏.

اس جوان کا کیا کہنا! اگر یہ قریش میں سے ہوتا تو تمام عرب کو اپنے عصا سے ہنکا لے جاتا۔ جس پر ابو سفیان نے کہا کہ یہ قریش ہی کا ایک فرد ہے اور میں جانتا ہوں کہ اس کا باپ کون ہے۔ عمرو ابن عاص نے پوچھا کہ وہ کون ہے؟ کہا کہ وہ میں ہوں۔[۱]

چنانچہ تاریخ اس پر متفق ہے کہ ’’زیاد‘‘ کی ماں سمیہ جو حارث ابن کلدہ کی کنیز اور عبید نامی ایک غلام کے نکاح میں تھی طائف کے محلہ ’’حارۃ البغایا‘‘ میں بدنام زندگی گزارتی تھی اور اخلاق باختہ لوگ اس کے ہاں آیا جایا کرتے تھے۔ چنانچہ ایک مرتبہ ابوسفیان بھی ابو مریم سلولی کے ذریعہ اس کے ہاں پہنچ گیا جس کے نتیجہ میں زیاد کی ولادت ہوئی۔ بہرحال جب عمرو نے ابو سفیان کی زبانی یہ سنا تو اس نے کہا کہ: پھر اسے ظاہر کیوں نہیں کرتے؟ اس نے حضرت عمر کی طرف اشارہ کرتے ہوئے کہا کہ مجھے ان کا ڈر ہے، ورنہ آج اسے اپنا بیٹا قرار دے لیتا۔ اگرچہ اسے یہ جرأت نہ ہوئی، مگر معاویہ کو جب اقتدار حاصل ہوا تو اس نے اس سے خط و کتابت کا سلسلہ شروع کر دیا۔ کیونکہ معاویہ کو تو ایسے لوگوں کی ضرورت تھی ہی کہ جو ہوشیار و زیرک اور جوڑ و توڑ کرنے میں ماہر ہوں۔ بہرصورت جب امیر المومنین علیہ السلام کو اس خط و کتابت کی اطلاع ہوئی تو آپؑ نے زیاد کو یہ خط لکھا جس میں اسے معاویہ کے ورغلانے سے خبردار کیا ہے تاکہ وہ اس کے فریب میں نہ آئے۔ مگر وہ اس کے بہکانے میں آ گیا اور معاویہ سے جا کر مل گیا اور اس نے اسے اپنا بھائی قرار دے کر نسبی اعتبار سے ملحق کر لیا۔ حالانکہ پیغمبر اکرم ﷺ کا ارشاد ہے:

اِنَّ الْوَلَدَ لِلْفِرَاشِ وَ لِلْعَاهِرِ الْحَجَرُ۔

بچہ شوہر کا متصور ہوگا اور زانی کیلئے سنگساری و محرومی ہے۔[۲]↑